Bitte
logg dich ein
oder
registriere dich
.
1 Stunde
1 Tag
1 Woche
1 Monat
Immer
Einloggen mit Benutzername, Passwort und Sitzungslänge
Neuigkeiten:
Übersicht
Forum
Hilfe
Suche
Kalender
Einloggen
Registrieren
SCL Tigers Pinboard
»
Tiger Talk
»
1. Mannschaft
»
Heiniger Tinus SCL-Song
« vorheriges
nächstes »
Drucken
Seiten: [
1
]
Autor
Thema: Heiniger Tinus SCL-Song (Gelesen 7128 mal)
Endo
Full Member
Beiträge: 157
Heiniger Tinus SCL-Song
«
am:
6. September 2015 10:14 »
das verzeut är de hüt, uf facebook gfunge.
HOHOHOPP LANGNOU
Tägscht für d`Präsentation vom nöie Tigersong
I ma mi bsinne, dass hie hinger ar Schwelli Hinge raube no Naturysch isch gsy. U dass i aube bi ga luege, wie wyt dass sie afe sy mit em Bou vor Kunschtyschbahn. U de ha ni gseh, wie d`Spieler vom SCLangnou säuber bi däm Bou hei mitgschuflet u mitpicklet.
I weiss o no, wie ni aus Schueubueb für ds entscheidende Spiel gäge Visp bim Hösubuur e Treichle bi ga hole. S`het nüt gnützt, üser sy gloub ersch es Jahr später i d`Nati A ufgstige, treichlet wird no hüt. 1976 sy sie när Schwizermeischter worde. Fasch aui Spiler vo dere Mannschaft sy Langnouer gsy: D`Lehme Giele, Wüeterich Hausi, Schänk Simu, Längwyler Sössu, die sy au i mim Auter gsy- u klar bi ni huerestouz gsy uf die.
I bi denn wie die drissgi gsy u ha scho sit es paar Jahr eigeti Lieder gschribe gha. Der erscht Song, wo ni im Sinus-Studio z`Bärn ufgno ha isch e 45 Toure-Single gsy :„Hopp Langnou“. Zaut het die Ufnahm der Hockeyclub. U wenn i am ne Mätsch bi gsy u sie dä Song hei abgla, de ischs mir aube huerepinlech gsy – u, ja klar, glichzitig hets mi o gfröit wie ne Moore!
Jetz, fasch 40 Jahr später, lütet mir vorem entscheidende Spiel gäge Rappi e Schurni vor BZ a u fragt mi, öb i wieder e Song würd schribe, we sie Rappi schlö u ufstige. I ha mi drückt u gseit, ja, ok, villecht, mou, momou, de würdi mirs auso überlege. Wo der Ufstig perfekt isch gsy, hei sie ir BZ gschribe
„Tinu Heiniger scheibt einen neuen Song“. Heilanddonner, so sy die Schurnis, mache usere Muus grad e Tiger. Auso guet, i cha ja probiere u luege, was usechunnt.
Wo ni der Tägscht ha gha, ha ni ne am Bruno Marazzi, mit däm bi ni zäme i d`Schuel, u am Peter Jakob gschickt u ha se gfragt, öb sie d`Ufnahme würdi sponsere. Beid hei zuegseit.
Super! Merssi tuusig!
När ha ni mi mit em Presidänt vor Fanszene Langnou, mit em Tinu Leuebärger, troffe. U gli scho hei mir is hie hinger mit paar ne vo dene sympathische Fans troffe u hei Pouke u Treichle u Refrain- Gsäng ufgno. Im Ougschte bi ni mit dene Ufnahme u mit mine Bandkollege, der Lehme Pudi, o är e Langnouer ghört o zu mir Band, ab uf Holland. U dert i dere Chiuche, i däm „Studio the church“ bim Reyn Ouwehand hei mir när dä Song ufgno.
No öppis zum Cover vo dere CD, wo ni zäme mit mim Fründ am Bärnu Schluep ha gmacht. I bi im Juli vo däm Jahr z Italie im ne chline Stedtli i ne Läbesmittulade, u dert ha ni die aute Tigerchäsli entdeckt, es Schachteli, wo`s gloub hie bi üs scho lang nümm git. I ha sofort gwüsst, das passt, das git ds Cover. Die ygfleischte, ygkäsete SCL Fans, die rede ja o nit vo de Täigers, nei, die rede vo de Chäsli. U dene Fans isch`s im Fau o gliich, we sie z Oute verzeue, sie heige usse am Stadion no Siuberringe müesse montiere, für we d` Langnouer chömi, dass sie dert ihri Chüe chönni aabinge. I säge nech nume eis Giele, chöit die Ringe wieder abnäh, mir spile ire angere Liga!
T.H. afangs Septämber 2015
Gespeichert
schnouz
Hero Member
Beiträge: 1145
Antw:Heiniger Tinus SCL-Song
«
Antwort #1 am:
6. September 2015 11:00 »
Freuemi uf dä Song
Langnou Schangnou Bärou Gou Hoopp Langnou
Gruess ... schnouz
«
Letzte Änderung: 6. September 2015 11:28 von schnouz
»
Gespeichert
blueline
Hero Member
Beiträge: 1204
wer träumt hat die hoffnung noch nicht aufgegeben
Antw:Heiniger Tinus SCL-Song
«
Antwort #2 am:
6. September 2015 11:10 »
...äs chunnt scho guet ou mit däm auti schachteli ufem cover, wo ig vo johre in schwede ineme museum au scho adrofe ha
...dä song vom tinu wird passe
Gespeichert
...lebe heute und denke nicht an morgen...
...denn was morgen sein wird, weiss man heute nicht...
...ein tiger bleibt ein tiger....
Endo
Full Member
Beiträge: 157
Antw:Heiniger Tinus SCL-Song
«
Antwort #3 am:
6. September 2015 14:54 »
HOHOHOPP LANGNOU
Ds Stadion
Isch pumpevou
Ghörsch se gröhle
Hopp Langnou
U die aute
U die schöne
Treichle, ghörsch se
Wie sie töne
Uf der Schlöf
Ar Schwelli hinge
Ghörsch se johle
Ghörsch se singe
Langnou, Schangnou
Bärou, Gou
Hohohopp Langnou
Mir juble
Wie Duble
Mir aui hie hinge
Mir bibere, singe
U Hausi u Jüre
Die dräie fasch düre
Sie bätte, sie spinne
Lieb Gott, bitte gäu
Jetz hiuf, aber schnäu
U mach, dass üser gwinne
U när ufzmau
Wird’s totestill im Tau
Isch öpper gstorbe?
Nei, nenei
Isch d`Frou dervo?
Jetz bisch allei?
Was isch, was hesch?
Du machsch e Stei
Jetz hör doch uuf
Mir gö fasch druuf
Sy truurig wie ne Moore
Die Stoglisieche hei verlore
Du bisch e Jammerisiech
Hör uuf gränne, chumm, sing
Langnou, Schangnou
Bärou, Gou
Hohohopp Langnou
E Löi vordruff
Ou nei pfithuss
E Drach, e Bär
Sogar e Muus
He, weisch wie doof
Das wär e Straf
U Oute isch e Bahnhof
U Langetau es Kaff
U mir hei gottseidank
Der Tiger im Tank
U der Haas uf der Bank
U der Jakob, dä macht Bank
Langnou, Schangnou
Bärou, Gou
Hohohopp Langnou
Daheim mis Häsli
Nimmt für d`Chäsli
Ds schönschte Väsli
Tuet gäub u roti Blueme dry
S`git Chäs u Brot u Schnaps u Wy
Mir zünde tuusig Cherze a
U singe eis u stoosse a
Der SCL isch Nati A
U Tiger im Fau
Die chöme au
Die chöme aui usem schöne
Däm schöne, schöne, schöne
Däm schöne Ämmitau
Langnou, Schangnou
Bärou, Gou
Hohohopp Langnou
Gespeichert
Neil Nicholson
Hero Member
Beiträge: 638
Antw:Heiniger Tinus SCL-Song
«
Antwort #4 am:
6. September 2015 15:20 »
Cha öpper es Fuimli mache vom wahre Martin bi drum no ds Sankt Ginggouf
Gespeichert
Neil Nicholson
Hero Member
Beiträge: 638
Antw:Heiniger Tinus SCL-Song
«
Antwort #5 am:
6. September 2015 20:22 »
Hm auso, merci Löitschegrebli. Dr aut Preuss u siner Ungergäbene schisssts äuä huere a, aber Langnou isch scho wider ir Flimmerchischte cho
Gespeichert
rocky53
Sr. Member
Beiträge: 477
Antw:Heiniger Tinus SCL-Song
«
Antwort #6 am:
7. September 2015 06:11 »
das isch so neil u tinu hed ou no eine usegla vo wäge zitat: siuberringe ums oltener stadionli mach um chüe a z binge si chönese wider wägg nä langnau isch e Liga höcher
Gespeichert
finn1
Hero Member
Beiträge: 736
Antw:Heiniger Tinus SCL-Song
«
Antwort #7 am:
7. September 2015 08:07 »
I ha gester am Tinu übrigens ou no ä Fröid gmacht.
Bi zu ihm häre u ha ihm mini Schallplatte us äm Jahr 1976 unger d'Nase gha. Hopp Langnau (uf dr B-Site isch übrigens dr Song "Himmugüegu"
)
Wo ig die här heigi het är wöue wüsse und ob ig überhaupt no ä Plattespieler heigi. Die Platte het mir mou mi Vater im aute Fanlade kouft (unger dr Haupttribüne näbem Bratwurst-Stand, für die wo sech no möge erinnere). Das muess a eim vo mini erste Spiel gsi si, afangs 80er Jahre! U klar cha ig die no lose, da i no ä Plattspieler ha. Die Platte funktioniert iwandfrei.
är het mir när no s'Cover signiert u het immer no fröid gha.
Sini nöie Platte bzw. CD wird ig de ou choufe. Dä Refain het me doch aube im Fanegge no gsunge. Ha ig aber scho lang nüm ghört!
Gespeichert
Facebook ist Stasi auf freiwilliger Basis
redwing19
Hero Member
Beiträge: 659
Antw:Heiniger Tinus SCL-Song
«
Antwort #8 am:
7. September 2015 20:53 »
-EILMELDUNG-
Langnau mit neuer Stadionhymne, die bereits Nr. 1 in den USA-Charts ist!
Ja, damit hatte wohl niemand gerechnet! Die SCL Tigers machten keine grossen Faxen während der Vorbereitung auf die neue Saison, nein, man bereitete sich sehr sehr still auf das kommende Spektakel vor. Irgendwie ahnte man aber, dass das nicht die ganze Wahrheit sein konnte, irgendwas haben doch die Tiger noch Köcher!
Und siehe da! Während wir gestern Abend alle artig in den Federn lagen, hatte die neue Stadionhymne der SCL Tigers klammheimlich in der Langnauer Freilichtdisco "Flüssigbschütti" Premiere. Fast 51 Zuschauer machten die Präsentation des Songs zu einem monumentalen Hammerereignis. Die Leute klatschten so laut mit wie noch nie, sie weinten zum Refrain, sie küssten ihre Kühe, sie gabelten ihren Mist, kurz und gut: so etwas gibt es nur im Emmental.
Der Song besticht durch einen brillianten Text, knallharten Riffs, Hip-Hop und R'n'B-Elementen so wie einer extrem ausdrucksstarken Stimme. Ich habe den Song bereits gestern gehört, da ich als Ehrengast eingeladen war weil eine Melkmaschine ausgefallen war. Ich sage Euch: Das war keine Hühnerhaut mehr, das war die reinste Vogelschwarmhaut die ich hatte. Still habe ich ein Tränchen verdrückt. Ganz klar, diese Hymne wird die Schweizer Eishockeywelt in den Grundfesten erschüttern.
Damit aber nicht genug, der Song, da eben sehr international komponiert und von führenden, anonym bleiben wollenden Rockstars aufgenommen, schlug in den Staaten ein wie eine Bombe. Bis jetzt um 20.00 Uhr sind in den USA bereits 22 Mio CD's verkauft worden, was Platz 1 in den Charts bedeutet.
Ich will Euch dieses Jahrhundertwerk natürlich nicht vorenthalten, die Perner Ceitung hat freundlicherweise einen Link reingekupfert, den man anklicken kann, und dann - zurücklehen, headbangen, hopsen, tanzen, mitsingen! AC/DC hat sich übrigens auch schon angemeldet um diesen Song sofort zu covern.
Hier der Song:
http://www.bernerzeitung.ch/videotv/?channel_id=38&video_id=226266
Quelle: Hardboiled SCB (Facebook)
Gespeichert
Bage
Hero Member
Beiträge: 981
Antw:Heiniger Tinus SCL-Song
«
Antwort #9 am:
8. September 2015 07:26 »
Es war wirklich grandios! Schnolz und Mänfu waren nicht mehr zu bremsen beim Stage Diving. Beim anschliessendem Crowdsufing sind sie zwar dann ziemlich stationär am Boden geblieben, aber das konnte die Begeisterung in keinster Weise stoppen!
Gespeichert
Drucken
Seiten: [
1
]
« vorheriges
nächstes »
SCL Tigers Pinboard
»
Tiger Talk
»
1. Mannschaft
»
Heiniger Tinus SCL-Song