6
« am: 6. September 2015 10:14 »
das verzeut är de hüt, uf facebook gfunge.
HOHOHOPP LANGNOU
Tägscht für d`Präsentation vom nöie Tigersong
I ma mi bsinne, dass hie hinger ar Schwelli Hinge raube no Naturysch isch gsy. U dass i aube bi ga luege, wie wyt dass sie afe sy mit em Bou vor Kunschtyschbahn. U de ha ni gseh, wie d`Spieler vom SCLangnou säuber bi däm Bou hei mitgschuflet u mitpicklet.
I weiss o no, wie ni aus Schueubueb für ds entscheidende Spiel gäge Visp bim Hösubuur e Treichle bi ga hole. S`het nüt gnützt, üser sy gloub ersch es Jahr später i d`Nati A ufgstige, treichlet wird no hüt. 1976 sy sie när Schwizermeischter worde. Fasch aui Spiler vo dere Mannschaft sy Langnouer gsy: D`Lehme Giele, Wüeterich Hausi, Schänk Simu, Längwyler Sössu, die sy au i mim Auter gsy- u klar bi ni huerestouz gsy uf die.
I bi denn wie die drissgi gsy u ha scho sit es paar Jahr eigeti Lieder gschribe gha. Der erscht Song, wo ni im Sinus-Studio z`Bärn ufgno ha isch e 45 Toure-Single gsy :„Hopp Langnou“. Zaut het die Ufnahm der Hockeyclub. U wenn i am ne Mätsch bi gsy u sie dä Song hei abgla, de ischs mir aube huerepinlech gsy – u, ja klar, glichzitig hets mi o gfröit wie ne Moore!
Jetz, fasch 40 Jahr später, lütet mir vorem entscheidende Spiel gäge Rappi e Schurni vor BZ a u fragt mi, öb i wieder e Song würd schribe, we sie Rappi schlö u ufstige. I ha mi drückt u gseit, ja, ok, villecht, mou, momou, de würdi mirs auso überlege. Wo der Ufstig perfekt isch gsy, hei sie ir BZ gschribe
„Tinu Heiniger scheibt einen neuen Song“. Heilanddonner, so sy die Schurnis, mache usere Muus grad e Tiger. Auso guet, i cha ja probiere u luege, was usechunnt.
Wo ni der Tägscht ha gha, ha ni ne am Bruno Marazzi, mit däm bi ni zäme i d`Schuel, u am Peter Jakob gschickt u ha se gfragt, öb sie d`Ufnahme würdi sponsere. Beid hei zuegseit.
Super! Merssi tuusig!
När ha ni mi mit em Presidänt vor Fanszene Langnou, mit em Tinu Leuebärger, troffe. U gli scho hei mir is hie hinger mit paar ne vo dene sympathische Fans troffe u hei Pouke u Treichle u Refrain- Gsäng ufgno. Im Ougschte bi ni mit dene Ufnahme u mit mine Bandkollege, der Lehme Pudi, o är e Langnouer ghört o zu mir Band, ab uf Holland. U dert i dere Chiuche, i däm „Studio the church“ bim Reyn Ouwehand hei mir när dä Song ufgno.
No öppis zum Cover vo dere CD, wo ni zäme mit mim Fründ am Bärnu Schluep ha gmacht. I bi im Juli vo däm Jahr z Italie im ne chline Stedtli i ne Läbesmittulade, u dert ha ni die aute Tigerchäsli entdeckt, es Schachteli, wo`s gloub hie bi üs scho lang nümm git. I ha sofort gwüsst, das passt, das git ds Cover. Die ygfleischte, ygkäsete SCL Fans, die rede ja o nit vo de Täigers, nei, die rede vo de Chäsli. U dene Fans isch`s im Fau o gliich, we sie z Oute verzeue, sie heige usse am Stadion no Siuberringe müesse montiere, für we d` Langnouer chömi, dass sie dert ihri Chüe chönni aabinge. I säge nech nume eis Giele, chöit die Ringe wieder abnäh, mir spile ire angere Liga!
T.H. afangs Septämber 2015